芷珊約您丨阿B當年破產拒絕溫拿好兄弟幫忙　鍾鎮濤：自己嘅事應該自己承擔

由黎芷珊主持的TVB節目《芷珊約您》在昨晚（4月21日）首播，打響頭炮的嘉賓是已經在樂壇屹立50年的溫拿樂隊。

芷珊除直擊譚詠麟（阿倫）、鍾鎮濤（阿B）、陳友、彭健新及葉智強在澳門的溫拿告別巡唱綵排及上台前的關鍵時刻外，還跟他們到吉隆坡見證他們連串告別巡場宣傳活動。

▲ 阿B以書法歌頌溫拿兄弟情。

兄弟互相體諒

溫拿屹立多年，最為人津津樂道的除是一首又一首的名曲外，還有他們的兄弟情。樂隊當中，由於阿倫及阿B較受歡迎，二人在溫拿出道不久已獲各方邀請作單飛發展，為顧及其餘3位好兄弟而一直未有行動。

陳友在節目中接受芷珊單對單訪問時，娓娓道來溫拿為何在1978年時決定嘗試各自發展，說：「嗰兩個靚仔小鮮肉好多人搵佢哋獨立發展架嘛，咁你走咗隊band點呢？」

陳友繼指：「我覺得佢哋有難處嘅，咁我哋3個（陳友、健仔及智強）咪商量話不如停吓，各有各做啲嘢先啦，幾年後睇吓係咪再聚埋啦，唔通30歲仲彈結他咩，係咪應該搵啲自己各自嘅事業呢？大家好兄弟，有啲嘢唔好等佢講，大家明吖嘛。」極度窩心，亦因為這樣，溫拿建立了每隔5年便聚在一起開騷的傳統。

▲ 陳友接受芷珊單對單訪問。

教導歌迷互相尊重

芷珊再追問陳友見到同隊有其他隊員更受歡迎會否感到唏噓時，陳友說：「睇你執咗咩籌，咁你執咗支打鼓籌，你咪認住支打鼓籌。唱歌嘅係front man，一定要有咁嘅條件，就係睇起上嚟好舒服、可以吸引到萬千擁躉嘅。自己要問番自己有冇呢啲條件先？我覺得我後生嗰時就冇（呢啲條件）嘅。」

另外，芷珊還追問阿倫與阿B的樂迷會否不和，對此阿倫即收起一貫的頑皮嚴肅謂：「我哋會教導佢哋，我哋係一隊band嚟，鍾意我要愛屋及烏。」阿B則謂：「跟咗好多年嘅fans，就冇分鍾意邊個邊個架喇。」

▲ 阿倫與阿B為隊中人氣成員。

阿B拒絕兄弟幫忙

無所不談的5子，提到阿B在2002年面對經濟難關時，阿倫坦言當時其餘4子都想盡辦法想幫阿B度過難關：「我哋成班有諗過不如我哋開演唱會同佢搞掂佢啦，但阿B就話唔使。」

阿B在旁即接著說：「發生咗事情就面對啦，佢哋係好有心想幫我呢件事，但我自己嘅事應該自己承擔，就算係幫我，都冇理由佢哋咁辛苦嚟幫我。」5子互相的扶持及體諒，配以芷珊「好兄弟無須多講，永遠都係互相支持」的旁白，煞是感人。

▲ 陳友與阿倫。

玩自殘遊戲兩敗俱傷

有溫拿的地方，就有美食和歡笑。5子受訪時大談當年奀皮事件，原來阿倫及陳友曾因一時貪玩大玩自殘遊戲，結果兩敗俱傷。陳友說：「我同阿倫每人一嚿拳頭咁大嘅芥辣，然後一齊啪入口唔准飲水！」

然後阿倫說：「大家咪互望，總之有任何反應就輸！」陳友再說：「我嗰晚好辛苦，個胃轉嚟轉去，見阿倫冇打嚟以為佢冇事，點知第二朝見到佢塊面黃晒。」阿倫沒好氣謂：「我嘔到黃膽水都出埋嚟。」

此外，阿倫又大爆智強與陳友相當爛瞓，其中有次因擔心昏睡不醒的阿強有事，驚動酒店職員幫忙開門，豈料阿強不但瞓得好稔，更連被開著的燈「Cup」住整塊臉也渾然不覺，十分搞笑。

最新影片推介：吳家樂專訪

HKET App已全面升級，TOPick為大家推出一系列親子、健康、娛樂、港聞及休閒生活資訊及影片。立即下載︰https://onelink.to/f92q4m

追蹤TOPick WhatsApp頻道睇最新資訊︰http://tinyurl.com/3dtnw8f5